Хуманитарна предновогодишна акција во „Концепт центарот Една може!/Една прави“

Детска празнична претстава, Дедо мраз со пакетчиња за 140 дечиња, со поддршка на „Телеком Фондација“, ќе бидат споделени со дечињата од еднородителските семејства, членки на „Една може!“ утре од 13 до 16 часот во „Концепт центарот Една може!/Една прави“.
Истовремено, ќе споделиме пакети со гардероба, празнични украси и играчки и бебешки суплементи, кои ги собрале во заедничка акција со хуманата Ординацијата на Др. Ѓорги Паскалов, традиционано, втора година по ред.
-Нашите деца заслужуваат топла облека, играчки, и радост и безгрижност за празниците, исто како и сите деца, затоа се обединивме, ние, силните мајки од „Една може!“, и покажуваме заедно со нашите емпатични пријатели/ки, што значи реална грижа и љубов. Истовремено работиме на унаредување на правата преку системско решавање на досега игнорирачките пракси кон овој вид на семејства, но и преку детабуизирање, дестигматизирање и сензибилизација, и на самата целна група, на граѓаните и на тромавите и инертни институции и државни службеници. А 2017 година ќе ја запомниме по земање на судбината во сопствени раце, преку формирање на првата иновативна социјална Компанија за производство и продажба на органска, јадлива, висококвалитетна козметика за умна и едноставна хигиена и нега на кожа „Една прави“ со темели изникнати од неиздржливата неправда кон работничките права на самохраните мајки, воспоставувајќи нови стандарди за работни односи, кон жените самохрани мајки- вели Дороти Пачкова, претседателката и основачка на единствената активна граѓанска „грас рут” организација за унапредување на права на членки и членови на еднородителски семејства во Македонија, „Една може!”.

Рачно изработен производ од „Една прави“

По овој настан, следува акција за собирање на храна, за полна празнична трпеза за еднородителските семејства, затоа ги покануваат сите добронамерни, граѓани и компании, да донираат здрава храна (житарки, зеленчуци и овошки, замрзната храна, протеини, јатки, мешунки, зрнасти производи, суви овошја, зачини, чаеви и кафиња, и детска храна) во „Концепт центар Една може!/Една прави“ во кои домуваат како организација, благодарение на соработката со Комерцијална Банка, АД Скопје, секој работен ден од 10.00 до 17.00 часот, а може да ги контактирате на телефонот: 025511892.