Графичката дизајнерка од Скопје, која работи под псевдонимот Руки Чуки, создаде мини линија на патики со уникатен дезен. Платнените обувки се со бела основа, која е ишарана со цртежи направени со специјални бои за текстил. Моделите се урбани и колоритни, а инспирација за истите бил Лондон.
-Моментално сум во Лондон, град кој ми е инспирација искрено за сè што работам од кога сум тука. По секојдневно цртање на сè и сешто се разви идејата за дизајн и на патики. Мојот сопруг е колекционер на патики и малку е тешко да се најде „совршен” модел на интернет или во продавниците, па можеби и од таму ми дојде дополнително идеја и инспирација. Инаку тие се само дел од списокот на дизајни кој што планирам да го реализирам-вели Руки.
Сите заинтересирани можат да го посетат нејзиниот сајт rukichuki.com за дополнитени информации и за нарачка на пар уникатни патики. Меѓу другото може да се нарачаат и друг тип на патики со различни цртежи изработени од Руки.
Руки Чуки, која има дипломирано на Ликовната академија во Скопје – насока графика, важи за една од најкреативните графички дизајнери кај нас. Зад себе има неколку групни изложби, како и проекти со својот колега Иван Петрушевски-Флим, од кои се издвојуваат постановката „Продажба на старо“, како и изложбата на графики. Меѓу другото, таа беше авторка и на плакатот на 30-то издание на Фестивалот на филмска камера „Браќа Манаки“. (А.Н.)
Нема коментари