Алесандро Микеле во рамките на Миланската недела на машка мода ја прикажа новата колекција на „Гучи“ за есен-зима 2020/21, под слоганот #RaveLikeYouAreFive во чест на петте години како креативен директор на модната куќа. Ревијата се одржа во Palazzo Delle Scintille, палата во арт нуво стил. Визуелно извонредно изгледаше ревијата и големата писта со огромно нишало кое се движи на пистата, но машката колекција секако ќе ја подели модната публика. Детските чевличиња и кошулчиња, ретро панталоните над глужд, комбинациите со бермуди и чорапи дигнати до колена, искинатите фармерки и џемперите со дупки нема да им се допаднат на мажите што сакаат класика, но оние што преферираат неконвенционален изглед ќе најдат инспиративни моменти.
Но зад модните екстреми се крие целта на Микеле. Тој си игра со темите мажественост и женственост и во белешките за колекцијата вели дека колекцијата зборува за токсичната мажественост – онаа што ги храни насилството и сексизмот. „Време е да ја испочитуваме слободата на самоопределување без социјални ограничувања, авторитарни санкции и задушувачки стереотипи. Мажот треба да се соедини со својата нежност и кршливост. Нишалото кое се движи во центарот на пистата де на едната, де на другата страна, симболично го претставува балансот меѓу двете екстреми – мажественоста и женственоста.“
Нема коментари