Месецот декември за познатиот дизајнер Никола Ефтимов значи подготовки за празничните денови кои почнуваат со католичкиот Св. Никола, потоа следат Св. Луција, православниот Св. Никола, вечерва на католичкиот Бадник тој ќе оди на миса во црква, по што утре следи свечен ручек кај неговата сестра Јасмина, а празничната сезона ќе ја финишира со православниот Бадник кој ќе го прослави во домот на татко му. Неговите македонски, хрватски и австриски корени му овозможиле богатство од влијанија, различни традици и растење, како што вели, во духот на толеранција, што е особено евидентно во овој период од годината. Дизајнерот ни откри колку многу му значат овие денови и како ги слави празниците, а ни кажа дека овој период на Адвент секој ден се раѓа нова идеја за поставување на некој предмет или одредена декоративна група на одредено место. Како љубител на убавото и содржајното, внимателно уредува и декорира и често композицијата ја објавува на својот профил на „Фејсбук“, а сега ни го објасни значењето на некои од нив.
Празничните денови во домот на Никола Ефтомов почнуваат со католичкиот Св. Никола
На социјалните мрежи веќе некое време постираш декоративни идеи, старински предмети и семејни фотографии, цвеќиња и разни аранжмани, што овие работи претставуваат за тебе и што те поттикнува да ги селектираш, организираш и фотографираш?
-Верувам дека секое човечко битие го има капацитетот да ја раскаже својата индивидуална приказна, исткаена од личното искуство, односот кон семејството, средината која го формирала, едукацијата итн. Потекнувам од семејство кое е етнички многу мешано, но доминантни влијанија се македонското, хрватското и австриското по мојата баба по мајка. Во втората половина на педесеттите години на минатиот век мојот татко заминал во Загреб да студира фармација. Таму ја запознал мајка ми. Започнала искрената и длабока љубовна приказна, која понатаму резултирала со брак и создавање на семејство. Иако домот го формирале во Скопје, јас со мојот брат и сестра растевме и во Загреб. Духот на толеранцијата и почитувањето на католичката и православна традиција го одбележија мојот живот. Подготвувањето за еден од најсвечените празници во текот на годината за мене е можност да ги помилувам сите спомени од годините кога се формирав како личност и да се искомуницирам со оние кои го напуштија физичкиот свет. Тоа си го должам на себе и на нив.
Новогодишно декорирање во знакот на модата
Празниците кај тебе почнуваат со Св. Никола преку католичкиот Божиќ сè до православниот Божиќ? Како изгледаат овие денови во твојот дом?
-Секоја година, колку и да сум зафатен со моите обврски, наоѓам време во последните месеци од годината полека да се подготвам за Божиќ. Ги чистам старите украси, гледам дали нешто ситно треба да се обвнови, полека ми се стабилизира и надоградува идејата како би декорирал таа сезона… Тоа е време на медитација и рефлексија. Како се нижат празниците, така полека расте еуфоријата. Католичкиот Св. Никола, Св. Луција (денот кога мајка ми ставаше да ‘рти пченица, а јас понекогаш леќа поради декоративноста на младите растенија), православниот св. Никола и конечно Бадник на 24-ти декември. Тоа е ноќта кога со сестра ми одам на миса. Веќе следниот ден сме на гости кај неа. Откако почина мајка ми, сестра ми ја презеде организацијата на семејните средби за најголемите католички празници. Овие денови се појачано емотивни, радосни поради симболиката на празникот, тажни поради тие што си заминаа.
После прославата на Новата година, следи православниот Божиќ. Бадниковата вечер е постојано кај татко ми, негов најголем благослов се членовите на семејството, негова најголема среќа кога тие ќе му го исполнат домот.
Во однос на мојот дом, во целиот период на Адвент, секој ден се раѓа нова идеја за поставување на некој предмет или одредена декоративна група на одредено место.
„На кафе со баба ми“
Што значат овие празнични денови за тебе? Колку ти се емотивно важни?
-Длабоко сум убеден во идејата дека секоја егзистенција која е поттикната од идејата за љубов кон себе, човештвото, нашиот дом планетата Земја, секој облик на живот итн, е приказна вредна за почит. Различните религиозни пракси се само различни искуства, никое од нив ја нема ексклузивноста на единствениот избор и пат, во крајна линија, сите доминантни учења се сведуваат на принципот на љубов.
По одреден сплет на околности јас сум крстен католик во Загреб. Сè уште се сеќавам на првата причест во загрепската катедрала, на првите часови по веронаука, на грижата на мојата баба да ми ги даде основите за мојот духовен развој и општите етички начела. Таа беше голем верник, но никогаш исклучив. На неаѝ ги должам лекциите за демистификација на злото, но и за принципот на љубов кон секој тип егзистенција и животен избор.
Како што веќе кажав, овие празници се период на појачани емоции. Деновите се одбележани со многу насмевки, многу прегратки, но и многу солзи, што јавни, што скришни да не бидат вознемирени ближните.
Во чест на Св. Никола
Меѓу сите овие предмети во твојот дом веројатно има некои што најмногу ти значат…
-Во текот на годините се собраа многу предмети со исклучителна сентиментална вредност. Дел од нив јас ги имам набавено, други се драги подароци од пријателите од периодот кога ги собирав кај мене да ги одбележиме најголемите католички празници, некои се останати од моето семејство. Минатата година татко ми ми подари три големи кутии со божиќни декорации кои ги користеше мајка ми. По првичната среќа, се стаписав, ми требаше некое време да се соземам од идејата дека таа за последен пат ги има допрено пред да замине. Се собрав, ги отврив кутиите, мислам дека секој лампион имаше своја приказна, а пред очи ми пролетаа минатите празници и спомените од дотогашниот живот.
Во празничните денови постојано се присутни и предметите кои ми ги има поклонето мојата баба од Загреб, матријархот на тој дел од семејството.
Ѕвезди со кристали, подарок од сестрата на Никола
Да не ја заборавиме модата и да споменеме нешто професионално – со што се занимаваше периодов и кои се следните планови?
-Откако решив да прекинам со пласирање на готова облека, целиот мој професионален фокус е на создавање облека по мерка. Како кај нас најчесто модните презентации се сведуваат на егзибиции на колекции, а во услови на ниту од далеку формирана модна сцена, решив нештата да ги правам според мојот календар. Онака како чувствувам и имам време, така и ќе подготвувам проекти кои се надвор од редовното работење. Пред извесен период започнав со подготовките на еден ислучителено автореферентен проект, во кој ќе се занимавам со машката мода. Не е врзан со рокови, постепено ќе објавувам материјал за презентација. За следните проекти читателите на Stylist.mk ќе ја имаат први можноста да бидат информирани кога ќе созреат условите.
Холандски декоративни фигури направени од различни ткаенини
Еден од омилените предмети е овој фенер подарок од пријателка
На католичкиот празник Св Луција се сади божиќна пченица, која според традицијата треба да ја предвиди жетвата во следната година, а Никола овојпат засади леќа
Ѕвоно со рачно сликан италијански ангел
Нема коментари