Ве информиравме за новата колекција на Кензо инспирирана од нашиот документарец „Медена земја“, најновата вест поврзана со оваа модна куќа е дека почина нејзиниот основач, Кензо Такада. Јапонскиот дизајнер Такада почина на 4 октомври на 81-годишна возраст од коронавирус во болница во Париз.
Познат по живописни графични шари и цветни дезени, Такада беше првиот јапонски дизајнер кој се прослави на париската модна сцена. Во 60-тите од родната Јапонија, како дипломец на познатата модна школа Бунка, доаѓа во Франција. Иако планирал да остане кратко, Такада до крајот на животот живее и работи во Париз. Тука прво го отвора бутикот Jungle Jap, a подоцна го лансира својот бренд Кензо со кој прв пат на ревија се претставува во 1970 година.
Во 1976 година ја отвора првата Кензо продавница и во следниот период реди успеси и станува важен дел од светската мода. Лансира и империја со парфеми. Во 1993 година неговот бренд го купува луксузниот конгломерат LVMH, а во 1999 година Такада се повлекува од местото на креативен директор. Наместо со мода, продолжува да се занимава со уметност, декорирање, креирање предмети за домот и мебел.
-Кензо Такада беше неверојатно креативен, со генијални потези замисли нова уметничка и живописна приказна што ги комбинира Истокот и Западот – неговата родна Јапонија и неговиот живот во Париз – вели Џонатан Бушет Манхајм, извршен директор на лајфстајл брендот на Такада натечен К3, а лансиран во јануари годинава.
-Имав шанса да работам покрај него многу години, секогаш со стравопочит, воодушевувајќи се на неговата љубопитност и на неговата отвореност. Тој изгледаше тивок и срамежлив на почетокот, но беше полн со хумор. Беше дарежлив и секогаш се грижеше за луѓето околу себе. Тој имаше жар за живот. Кензо Такада беше олицетворение на уметноста на живеење – додава Манхајм.
Нема коментари