ревии 0

Модерна силуета за префинети и интригантни жени во новата колекција на Росица Мршиќ

Од stylist @StylistMKD · На април 2, 2016

Да се следи сопствениот креативен израз, притоа да се биде секогаш свеж и поинаков, и мошне самоуверено да се следат светските тенденци и вметнуваат на свој начин секако дека е квалитет на секој добро изграден моден дизајнер . Ова го постигна и Росица Мршиќ на вчерашната ревија со која се отвори 13-тото издание на Моден викенд –Скопје. Таа во колекцијата за пролет-лето 2016 продолжува да го следи својот „карактеристичниот вокабулар“, истовремено претствувајќи нова сторија и полежерна и пофлуидна силуета, една модерна смиреност само повремено испрекината со структурални елементи.

Фото: Ани и Дими

Дизајнерката често се инспирира од сликари или уметнички правци, овојпат тоа се женските ликови од делата на Амадео Модилјани, што Росица го дефинира преку модерна силуета и меки и смирени линии во форма на синусоиди испреплетени во игра за да дадат опуштена и заоблена заводлива женска фигура.

Мршиќ престави серија на кратки горни делови со минималистички крој и конусна форма, најчесто комбинирани со широки и килот панталони кои се тенденција овие сезони, и со золништа карактеристични набрани фалти. Нуди и модерни комбинезони и долги фустани со испреплетени линии, но и кратки фустани со рамен крој или со средна должина со нагласена половина, како и палто со навидум едноставна форма, но сепак со покомплексен крој.

Фото: Ани и Дими

Во однос на колоритот и принтовите карактеристични за дизајнерката, оваа колекција и во овој аспект нуди смиреност, доминација на белата и црната, темно сини тонови со металик финиш и на материјали со ненападни шари и интересни текстури. Стајлингот е дополнет со деликатна шминка со акцент на усните, залижани фризури со структурални шишки, како и микс на ниски и сандали со високи потпетици кои ја продолжуваат модната игра на линии, избрани од бутикот ВИА. (К.Т.)