Emotional Landscapes е насловот на новата безродова колекција на експерименталната модна етикета „Лудус“, која ќе биде промовирана на 15 ноември во 22. 30 часот во Младинскиот културен центар. Перформансот ќе биде дел од програмата Fashion & Music во рамки на фестивалот за европски филм -„Синедејс“.
Колекциајта Emotional Landscapes ја разработува темата започната со претходната линија XYYX и е базирана врз фраза од песна на Бјорк од албумот Homogenic. Парчињата говорат за чувства на алармираност во јазик својствен за работата на „Лудус“. Публиката ќе има можност да погледне мултимедијален моден перформанс при што парчињата ќе ги носат модели избрани по пат на кастинг на социјалните медиуми.
Зад брендот „Лудус“ стои дизајнерот Драган Христов
„Лудус“ е модна етикета што произлезе од истоимената концептуална продавница отворена во Скопје во 2006тата година. Зад брендот стои дизајнерот Драган Христов, дипломец на Академијата за ликовни уметности Брера во Милано. Колекциите се движат меѓу носливоста и софистицираната авангарда, а за основа ги имаат чувствата, најчесто меланхолични и тажни. Финалниот резултат е монохроматски и минималистички, изработен главно од свила и природни проѕирни материјали, а силуетата е налик скулптура. Презентациите на „Лудус“, инспирирани од филмот и современата музика се настани со неочекувани локации што допринесуваат кон интелектуалниот карактер на етикетата.
За музичкиот дел на настанот ќе се погрижи Еми Ермилова.
Нема коментари