Фотографија: Матеа Смочиќ
Време е за „На терапија“, македонска телевизиска серија подготвена по странска лиценца според оригиналната, израелската „На терапија“, по чија франшиза серија продуцира HBO, а снимени се и хрватска и српска верзија. Серијата почна да се емитува вчеравечер на „Сител“ и додека ги сумираме реакциите од првата епизода, позборувавме со актерката Јелена Јованова, која го глуми еден од главните ликови покрај покрај Никола Ристановски, Висар Вишка, Драгана Костадиновска, Амернис Нокшиќи, Ангела Димитрова. Годиниве наназад Јелена со сигурни потези гради успешна кариера за домашната публика, во театар, на филм и во последно време и во телевизиски проекти, но паралелно создава и интернационална кариера. Беше на чекор до Холивуд со улогата во филмот на Анџелина Џоли, „Во земјата на крвта и медот“, но и со неколкуте европски продукции, а деновиве актуелна е информацијата за нејзината нова улога во шпански филм. Оваа актерка е препознатлива и со модните кампањи за дизајнерката Тања Кокев, а е заштитно лице на нејзиниот прв дизајнерски парфем, наречен токму Actress. Ама да се вратиме „На терапија“, и да откриеме повеќе за нејзиниот лик Милена, за соголувањето што се случува кога се оди на терапија кај психотерапевт и за динамиката и тешкиот предизвик на снимањето на серијата. Повеќе во следниов разговор со Јелена Јованова.
>>Како одеше патот до твојот ангажман во оваа домашна серија, што беше клучно да ја прифатиш улогата?
-Како што и одат работите, преку кастинг. Ми се јави Нела Витошевиќ, кастинг директорката на серијата „На терапија“ и ме покани на кастинг за ликот на Милена. Ги добив сцените за аудиција и договоривме термин кога ќе треба да дојдам во Скопје. Аудицијата имаше два круга на селекција, кои како што обично и бидува со Нела и режисерот Вардан Тозија – беа пофесионални, пријатни и пријателски отворена кон секој актер кој беше дел од кастингот. Се вратив во Загреб и по некое време ми јавија дека сум ја добила улогата. Среќата беше и повеќе од присутна во тој момент.
>>Кажи ни нешто повеќе за твојата улога во серијата„На терапија“? Што може однапред да ни откриеш за твојот лик? Во најавата се вели дека твојата Милена ги соголува своите чувства пред својот психотерапевт, докторот Терзиев, ама се случува и некој непрофесионален однос со него… Ќе ни ја објасниш ли ситуацијата на Милена?
- Милена е првиот пациентот кој го гледаме во ординацијата на доктор Виктор Терзиев.Триесет годишен анестезиолог, успешна во својата работа, лесно ранлива и емотивна. Веќе година дена е негов пациент и она што Виктор треба да го открие е дали Милена навистина е гранична личност, емотивно несозреана, депресивна и анкциозна какопоследица на прерано починатата мајка, депресивниот татко и низа други несреќнислучувања кои го бележат нејзиниот живот и за кои ќе слушате. Што се однесува до нејзиниот еротски трансфер со Викор, начинот на кој воопшто неги бира средствата во тоа, за љубовта или фиксацијата на доктор Терзиев кон Милена-ќе гледате сами.
>>Колку оваа серија успева да ги отвори темите за ментални болести и да го скрши табуто што постои во однос на одење на психијатар? Ликовите одат на психотерапевт поради некој свој личен проблем или дијагноза, колку сите ние имаме потреба во одреден момент да посетиме стручно лице?
- Веројатно потребата е поголема дури и повеќе од што сакаме да си призанеме.Не гледам ништо лошо во тоа да се поразговара со одредено лице кое може да те ислуша и да ти помогне. Напротив, лошо е ако бегаме од тоа дека имаме проблем кој ментално и физички нè блокира и се лажеме себе си дека нештото ќе помине само од себе без да се соочиме со себе си и вистината за нас самите во тој момент. Се надевам серијата ќе ги скрши ваквите лажни убедувања и ќе не натера малку подлабоко и похрабро да погледаме во одредени проблеми и да прифатиме дека не е срамота ниту грев ако за наоѓањето на изворот и решението за тој проблем се обратиме некому.
>>Одлична актерска екипа глуми во „На терапија“, каква беше динамиката на сетот за време на снимањето?
- Снимањето на „На терапија“ до сега беше најтешкиот предизвик за мене и покрај тоа што во својата измината километража имам снимено и работено на серии. Но, едно е да снимаш епизода на ден во која покрај тебе играат уште девет други лика, па теретот автоматски ти е помал, а сосема поинаку е да снимааш епизода на ден само со два лика кои седат и разговараат за многу битни работи.
На моменти беше ментално исцрпувачки, посебно поради фактот што паралелно работев и на втората сезона на „Преспав“, спремав еден долгометражен филм и еден краток. Многу ми значеше поддршката на Вардан Тозија и сите индикации кои ги добивав од него како режисер, како и начинот на кој ме водеше низ оваа приказна од епизода во епизода и вербата во мене која често беше поголема од онаа што јас ја имав во тие моменти за себе. Покрај режисерот она што на актерот му е потребно е и актерскиот партнер. Никола Ристановски е партнер каков што можеш да посакаш, актер од кој можеш и треба да учиш. Актер со кој лесно со допира до вистината во секој кадар. А таквото чувство е непроценливо, верувајте и ретко.
>>Како гледаш на новата тенденција, после долго време да се снимаат македонски серии? Покрај во „На терапија“ те има во „Преспав“, а се појавиваш и во „Инсајдер“…
- Само ќе си посакам така и да продолжиме.
Фотографија: Жарко Чулиќ
>>Зад себе имаш искуство со глумење во хрватската сапуница„Тајни“, која освен како професионален ангажман, емотивно многу е значајна за тебе, бидејќи на снимањето го сретна сопругот, актерот Стјепан Периќ. Очекуваше ли дека еден ангажман толку ќе ти го смени животот? И како сега функцонира твојот живот на релација Скопје-Загреб?
- Не очекував ништо. Можеби затоа се случи и нешто прекрасно. Отидов со цел и идеја одговорно да ја завршам својата задача и да го збогатам своето искуство пред камера. Немав ни најмала идеја дека ќе ми се случи сè ова што ми се случи. Веќе пет година сум на релација Загреб-Скопје и научив да функционирам и вака. Нормално дека ова темпо и начин на живот немаше да бидат замисливи и возможни доколку ја немав поддршката од Стјепан.
>>Покрај овој ангажман во Хрватска значајно беше што работеше на филмот на Анџелина Џоли „Во земјата на крвта и медот“. Го осети малку холивудскиот сјај, а исто така беше повикана на кастинг за улога на Бонд девојка во филмскиот серијал за агентот 007? Дали има некоја нова шанска за светски пробив во моментов? Колку си фокусирана на барање интернационални ангажмани?
- Филмот „Во земјата на крвта и медот“ секако дека ги потикнаа моите аспирации за интернационална кариера. Тој филм ги направи и малку подостижни. Минатото лето имав 16 видео кастинзи за Милева Мариќ за серијата „Гениј“ на Рон Хауард. Борбата за улогата траеше до последниот продукциски сотанок. Среќата не ме послужи за тоа, но секоја индикација добиена од него е школа која не би можела да си ја приуштам. Сум работела кастинзи и за големиот Теренс Малик, за Дени Бојл, Сем Мендес, Ники Каро…и верувајте дека за нештото да се случи не е доволен само талентот. Оваа лотарија зависи и од многу други фактори и верувам дека сè се случува тогаш кога и треба да се случи.
>>Ете најново, се појави информација дека доби главна улога во шпанскиот филм El desentierro…
-За време на Берлинале и работилниците на Жан Луи Родриг кои беа отворени за јавноста, секоја моја извршена задача била забележана од една глумица која ѝ ме преложила за оваа улога. Откако ги виделе сите мои снимени филмови и серии ми се јави режисерот Начо Руиперез да ми ја понуди улогата, секако доколку ми се допадне сценариото и она што треба да го играм. Среќна сум што сум дел од овој проект, што преку него се збогатувам со уште еден јазик и искрено се надевам дека на крај ќе имаме одличен трилер.
>>Соработуваш со модната дизајнерка Тања Кокев скоро од почетокот на нејзината кариера, носиш нејзини креации и си заштитно лице на нејзиниот парфем Actress, колку естетиката на Тања ти го погаѓа твојот стил? Начувме и дека Тања Кокев соработуваше со продукцијата „На терапија“, дали можеби токму ти ќе носиш некои нејзини парчиња?
-Во креација на Тања се појавувам во само една епизода, бидејќи стилот на Кокев кој приватно многу ме следи, го сакам и носам секогаш, не го следи толку мојот лик, односно Милена. Освен во една епизода останатиот аутфит на Милена е дело на костимографката Жаклина Крстевска. Тања овој пат многу повеќе ќе ја видите кај Драгана Костадиновска во ликот на Зана. Со Тања сме соработувале многу, многу работи сме исонувале и реализирале заедно и се надевам таквата соработка успешно ќе продолжи и понатака.
Милена е и на Инстаграм
*Не е дозволено пренесување на содржината на www.stylist.mk без одобрение на уредништвото. При објавување на материјали од модниот сајт www.stylist.mk, во други медиуми задолжително наведете го изворот од кој е преземен текстот и поставете хиперлинк. Цитирањето и објавувањето на линкот е задолжително, во спротивност ќе подлежите на правни мерки.
Нема коментари