Деновиве дизајнерот Драган Христов е преокупиран со две работи – минатата недела ја престави новата колекција „Орландо“ за етикетата што ја потпишува „Лудус“, која што од денес ја промовира и со лукбук, а викендов го организира второто издание на Super Design Pop-Up Store. Во рамките на настанот, во сабота и недела (9 и 10 мај), од 12 до 22 часот во галеријата во МКЦ, дваесеттина дизајнери од разни области ќе ги изложуваат и продаваат своите дизајни, а Stylist.mk ќе има свој конслутантски агол. Некаде помеѓу двете активности зборувавме со Драган за новата колекција составена од претежно парчиња во црвена боја наменети за мажи и жени, и која е резултат на неговото истражување на безродова облека, а и дизајнерот премиерно за Stylist.mk го откри и новиот лукбук направен со фотографот Жарко Чулиќ. Не случајно наречена „Орландо“ по новелата на Вирџинија Вуфл, најпознатото литератирно дело на тема на родова припадност, колекцијата на Христов се состои од 15 изгледи кои може да бидат и машки и женски. Низ црвената во „Орландо“ дизајнерот испраќа политича порака, но и преку безродовата мода ве интригира да размислувате за родовите односи, дискримунација и неутралност во домашното современие.
Лудус/ Орландо/ Пролет-лето 2015
Модел. Ана Калачоска
Фото: Жарко Чулиќ
Минатата недела ја представи новата колекција на „Лудус“, наречена „Орландо“ во кој правец те одведе инспирацијата и што создаде?
-„Орландо“ е најновата колекција, односно експеримент на „Лудус“ што претставува одвојување од претходниот принцип на работа. Задржани се неколку сегменти во креирањето на лукбукот, фотографот Жарко Чулиќ, моделката Ана Калачоска и студиото „Панаш“ задолженo за шминката и фризурата. Визуелно потсетува на минатите каталози, но новитетот е што овој пат сакав сликањето како процес во кој неизмерно ужива целиот тим да го отворам за публиката. Па така, гостите во Lotus Design Store беа поканети веднаш по презентацијата да ги видат одблиску и резервираат парчињата што ќе им се допаднат. Ова беше исто така своевиден експеримент, иако инстор-презентациите се нешто што го имаме направено и во концептуалната продавница „Лудус“. Инаку, колекцијата е направена скоро целосно од црвен транспарентен шифон, разбиен со рефлектирачки неопрен и ленти. Се состои од 15-тина парчиња наменети эа мажи и жени.
Концептот на колекцијата се темели на истражување на полето на безродова облека, како го сфаќаш овој сегмент, може ли да се креира облека која ги цели двата рода и тоа да биде успешна приказна за една безкомпромисна мода?
-Безродовата облека (на англиски agender) е тренд што го привлече моето внимание и ме наведе во насока на консумент во процесот на креирање на колекцијата. За разлика од унисекс облеката што е веќе oдамна воспоставена категорија во модата, безродовата облека е рефлексија на промените во односите меѓу родовите во општествата во светот. Тоа силно ме натера да проговорам за моите ставови за позициите на мажот и жената во нашиот контекст. Наместо мене, решив колекцијата да зборува эа тоа.
Дали колекцијата „Орландо“ е поттикната од книгата „Орландо“ на В.Вулф и во кој дел се рефлектира таа референца?
-За мене неминовно беше оваа колекција да го преземе насловот од романот на Вирџинија Вулф, „Орландо“. Нејзините дела се постојана референца во мојата работа.
Скоро целата колекција е во црвена боја… Која порака сакаш да ја испратиш со само една боја и може ли гардеробата на една личност да се базира само на една боја?
-Црвената боја треба да носи политичка порака, треба гласно да говори сама за себе. Причините за изборот на црвената боја не беа практични. Боите што ги одбираме при облекувањето не се случајни и скоро секогаш ja отсликуваат нашата внатрешност и тоа најчесто на несвесно ниво.
Едно време беше сопственик на концептуалната продавница „Лудус“ и кај тебе дизајнери се претставуваа колекции, сега ти се претставуваш во други концептуални простори како Lotus Design Store, па зошто таков простор и зошто не класична ревија или во рамките на Моден викенд-Скопје?
-Отсекогаш сум сметал дека е невозможно да се продуцира модна ревија кај нас. Не сакам импровизации и затоа овој пат решив презентацијата да биде во единствената продавница каде се продаваaт колекциите на „Лудус“ и да биде всушност отворена и спонтана фотосесија со малку гости, клиенти и мoдни новинари.
Задоволен си како се развива твојот бренд и дали сметаш дека кај нас постои публика за малку поавангарден и поневообичаен стил? Во таа смисла, каде ја гледаш иднината на „Орландо“?
-Публиката за поинаква модна понуда е многу ограничена, но за среќа е верна и нè поддржува од самиот почеток. Клиентите на „Лудус“ се креативци: дизајнери, архитекти, актери итн. Нашиот фокус е странскиот пазар и брендот се развива во тој правец.
Викендов ќе се одржи второто издание на Super DesignPop-Up Store. Кој е твојот мотив за овој настан и честите поп-ап продавници во кои се ангажираш? Дали е ова доследен начин на промовирање и афирмирање на македонскиот дизајн?
Второто издание на Super Design Pop-Up Store e викендов во галеријата при МКЦ и овој вид на продажба е самонаметнат по затварањето на „Лудус концепт стор“. Настаните се одлична можност эа продажба и зголемување на клиентелата на секој од учесниците, а атмосферата е нетипична за модниот свет. Посетителите, за среќа, се вистински консументи и поэнавачи на дизајнот.
Што најавуваш во програмата на uper DesignPop-Up Store, на што ќе биде ставено акцент и дали годинава ќе ја збогатиш програмата со дополнителни активности?
-Oваа година вклучуваме повеќе дизајн на производи, однсно дизајн и редизајн на мебел, производи эа домот и стационарен дизајн. Истотака ќе бидат вклучени и дизајнери на храна со едночасовни презентации.
Бидејќи долго време си на сцената и како организатор на настани и како сопственик на моден бренд, кои се најголемите пробематики што ја мачат падни-стани ситуацијата во македонската мода?
-Местот на „Лудус“ на македонската модна сцена отсекогаш е ненаметливо и нецентрално, не само како моден бренд, туку и како поддржувач на останатите дизајнери. Свесни сме дека работиме на млад и кревок пазар каде конкуренцијата и општата естетика не се во прилог на работата на концептуалните дизајнери. Македонската мода допрва треба да се гради и ресистематизира. Евидентно е дека недостигаат основните елементи эа достоинствена модна дејност како модна критика, образование…
Кој всушност вистински ја создава македонската мода?
-За жал, оние кои имаат средства за медиумска застапеност и краткотрајни амбиции. За среќа, нивното време бргу эавршува.
Што е она што постојано те воодушевува и секојдневно те мотивира да останеш во модата?
-Мојата креативност се темели на моето секојдневие и е еднаква на мојот начин на живот. Инспирацијата ми ја дава светската модна сцена, современата уметност, музиката, филмот… Mојата образовна позадинa е ликовната уметност, но медиумот эа да ги искажам моите ставови е модата.
Нема коментари