Птиците како симбол на слободата, човековите права, родовата еднаквост и надежта се во креативниот фокус на новата линија маици за лето 2016 на визуелниот уметник и графички дизајнер Горан Костовски- IndOg. Лимитираната колекција, што ја лансира под брендот Celebrate Life , ја промовира во саботата со целодневен настан кај склуптурата Јас и Ти во Дебар Маало. Птиците се дел цртежите од изложбата „Емигрирани во Слобода“, а покрај на маиците, се најдоа и на беџови и налепници. IndOg неодамна смини урбана фотосесија со новите маички по кратки ракави. Фотографиите ги направија Марко Монс (кој се јавува и како модел) и Христијан. Женските маици, пак, ги носи младата Ака. Реализацијата на „Емигрирани во слобода” е поддржана од програмата Културни приказни на Делегацијата на Европската Унија.
Инспирација за изложбата на IndOg било сè почестото и помасовно иселување на млади интелектуалци од нашата земја. Последниве години сведочат како луѓето, кои имаат сопствен став и се разликуваат од околината се осудени на отфрлање– и затоа емигрираат. Изложбата ги критикува едноумието и дискриминацијата кои го запоседнуват нашето секојдневие. „Емигрирани во слобода” се птици, цртани со акрил на картонски отпадоци пронајдени на улиците низ Скопје. Секоја од нив го третира чувството на отфрленост на луѓето во својата средина и отфрлањето на истата со цел подобра иднина. Репресијата е пресликана во една поинаква варијанта, коментирајќи го и нашиот елементарен недостаток на грижа за животната средина – преку птици кои се симбол на слободата, човековите права, родовата еднаквост и надежта.
На изложбата беше поставена кутија за донации и посетителите можеа да донираат и како благодарност да добијат дел од новата колекција на „Celebrate Life / Емигрирани во Слобода“- маици, беџови, налепници. Дел од собраните средства ќе бидат донирани за одредени иницијативи за помош на бездомните животни. Изложбата е дел од програмата Културни приказни на Делегацијата на Европската Унија. По отворањето,од 6 до 17 јуни постановката ќе може да се погледне во просториите на ЕУ инфо центарот во Скопје.
Нема коментари