Уникатниот накит на креативниот колектив Farina’s handmade ќе биде претставен в сабота (8 октомври) на Базарот нa современи ракотворби на Боемската улица во Дебар маало, Скопје. Станува збор за првиот базар од ваков вид во организација на Општина центар – Скопје и Македонска артисанска трговска организација МАТА, кој ќе трае од 10 до 20 часот. Марина, Надица, Елена и Марјан од струшкиот бренд за модни додатоци Farina’s handmade ќе се престават со новите брошеви, ѓердани, обетки,чанти, кои се дел од, како што велат тие „новата, есенска колекција за забавни луѓе“.
Со својот препознатлив разигран и арстистички стил брендот веќе е добро познат кај љубителите на модни уникати. Имаат учествувале на повеќе базари и изложби, како што се Модниот викенд-Скопје, Paratissima, новогодишниот базар во хотел „Арка“, а летово по четврт беа дел и од базарот на „ДримOn“ фестивалот во Струга. Името Farina’s handmade произлегло од препознатливата разиграна и позитивна Фарина од серијата „Палавковци“, која ја поистоветуваат со духот на нивните изработки. Овие „палави“ трагачи по нови уникатни дизајни, форми и комбинации , секојдневно креираат обетки, ѓердани, брошеви, прстени, чанти и несесери во кои доминираат ведри бои и симпатични принтови.
-Накитот го изработуваме од глинамол, кој рачно го сликаме со акрилни бои и на крај завршуваме со премаз од епоксидна смола, но користиме и пластична подлога на која лепиме испринтани сликички кои исто така ги премачкуваме со смола, додека торбите ги изработуваме од најразличен текстил, како што се на пример американ платно, чоја, скај, кожа итн. Експериментираме цело време, менуваме форми, бои, дезени за да не ни здодее ни нам ниту на нашите клиенти и обожаватели… Инспирацијата доаѓа неочекувано, некогаш нè инспирира некоја боја, друг пат форма, некогаш сетоа она што сме го прегледале од најразлични работи нашиот мозок го сумира и станува производ… Ретко се случува да не сработиме нешто во денот, окупирани сме со работата, дали физички или при барање идеи и инспирација, за нас сè е работа, многу ни значи тоа што не сме ограничени кога и колку треба да работиме, ја имаме својата слобода и уживаме во неа, веројатно затоа и постојано работиме – ни изјавија од Farina’s handmade во неодамнешното интервју за Stylist.mk.
Нема коментари