Американскиот бренд The Limited лансира линија инспирирана од популарната серија „Скандал“ и од ликот на Оливија Поуп што го глуми актерката Кери Вашингтон, односно замислен лик на елегантната и моќна прес-секретарка за кризни политички ситуации на претстедателот на САД. Соодветно на функцијата Поуп има потреба од моќна деловна облека, а ликот стана препознатлив и по модните комбинации што ги инспирира жените на моќни позиции. Тргнувајќи од тоа дека секоја моќна жена има потреба од разновидна, софистицирана и добро изработена облека, The Limited и главниот дизајнер на брендот Елиот Стејпелс, во соработка со Кери Вашингтон и костимографката на серијата Лин Паоло, создадоа колекција од елегантни панталони, палта и фустани претежно во неутрална палета со кои се слави женската елеганција. Следејќи ја естетиката и темата од серијата, колекцијата се обраќа на сите жени кои се успешни на работа, а притоа изгледаат модерно и софистицирано. Креациите ќе почнат да се продаваат деновиве по цена од 50 до 250 долари, а терминот се поклопува со почетокот на четвртата сезона на серијата „Скандал“.
Кери Вашингтон како Оливија Поуп во политичката драма „Скандал“
Нема коментари