Љубителите на бохо стилот сезонава имаат огромен избор на раскошни блузи со етно мотиви и со естетика позајмена од 70-тите. Бели и од селско платно, декорирани со вез и светкави апликации, со лежерни и волуменозни форми, бохо блузите се доволно впечатливи што се препорачува да комбинираат со едноставни парчиња. Познатите трендсетерки и модните блогерки го прифатија овој стил, а една од причините е што совршено се свклопува во естетиката на 70-тите, која е тенденција последниве сезони.
Одлично се стилизираат со џинс ткаенина – со шорцеви, здолништа и со boyfriend-фармерки. Дополнете со еспадрили или ниски сандали, со сламена шапка, платнена торба, бохо-накит и очила за сонце за комплетен изглед. Идеални се и како облека што ќе ја носите до плажа. Селските блузи се дефиниција на боемски шик стил, и најдобро е кога се дел од релаксиран стил, но доколку одлучите да ги носите на работно место бирајте блуза со посмирен изглед и комбинирајте ја со молив-здолниште или со бели летни панталони. Со соодветен стајлинг може да се носи и за вечерни излегуања во град или на некоја летна дестинација.
Модерните бохо-блузи нè потсетуваат на селските кошули што некогаш ги носеле нашите баби и прабаби како дел од народната носија, а особено се дел од романската и руската иконографија. Беа реоткриени во 70-тите години во време на хипи модата, и беа прифатени како светски тренд. Сега повторно се актуелни и привлечни поради разновидноста во комбинирањето и што можеме да ги носиме скоро секаде, на музички фестивали, на плажа, дури и во канцеларија.
Нема коментари