Во денешното време кога трендовите молскавично се појавуваат и згаснуваат, мантилот остана безвременско модно парче кое е задолжително во женскиот гардеробер. Бежов, црн, тегет или понекогаш со принт, мантилот е совршен избор за секој есенски период. Создаден од страна на брендот „Барбери“ пред повеќе од 100 години, присутен на модните писти и во стилот на познатите личности, мантилот и понатаму е популарен поради својот специфичен изглед и способноста да се комбинира скоро со сè.
Се вклопува во секакви стилови и одговара за различни пригоди – со класична кошула и чизми до глужд во неутрална боја ќе добиете комбинација за во канцеларија, а со шарена маица и патики-еспадрили за прошетка низ градот. Одлично одговара со блуза на пруги, џинс и патики, но може да се носи и во романтични и во гранџ комбинации, бидејќи подеднакво добро стои и со балетански и со „Док мартинс“ чизми. Го има во понудата на хајстрит брендовите, но и кај луксузните модни куќи и дизајнери. Модните креатори нудат нови верзии на есенски мантил, но најдобар совет е да изберете квалитетен класичен мантил во беж боја со дворедно закопчување, еполети на рамениците и ремен. Тоа е инвестиција што вреди!
Нема коментари