Фем фатал хероина во црвено која како да е излезена од некое филм ноар дело е описот на новата колекција на Armani Privè, кутур линијата на Џорџо Армани. Италијанецот вчера во Париз ја прикажа визијата за висока мода за сезоната есен 2014 и покажа мал исчекор од футуристичките теми препознатливи во неговите колекции. Покрај црвената боја, белата и црната се главните тонови со кои се раскажува новата дизајнерска приказна на Армани. Она што е малку поразлично од претходните колекции на креаторот се ретро референците во оваа новата, еден вид на нео-модернистичка симибиоза на класика со нагласени форми, како и екстравагантните детали во форма на велови и украси за глава и волуменозните игри со тул. Колекцијата почнува со комплети од сакоа и наметки со мини шорцеви, палта со панталони, блејзери со набори и мини здолништа, а се развива со креации со волумен, апликации на точки и цветови, принт на коцки и ромбови, 3Д форми од слоеви на тул, игра со сјајна текстура. Креациите се женствени, безвременски елегантни и споени со модни додатоци со класични форми.
Нема коментари